BELIN

Se te succediâ comme a mì
d'attrovâte foresto all'avventûa
e in te 'na néggia triste camminâ
pe poi in te 'na sägoma sconosciûa
dâ 'na secca facciâ
'na certa parolla te vegniâ da dî,
quella che a fà parte da lengua abitûale,
quella che a dîla ( dixan )
che se passe p'en portûale
e che in to vocaboläio stà a significâ :
" Un taggio da 'na chêuscia, vixin a-a cûa, de 'na bestia da maxellâ. "
Ma pe fâ 'na bella figûa
no ti diê a parolla do taggio vixin a cûa
ma n'edûcou : " Excuse me ! "
E se a risposta a saiâ
( L'è capitou a mì ! )
" Ûn Belin ! "
A Zena ti te sentiê ciù vixin
e d'in ta néggia ti veddiê spuntâ :
de Caignan i duî campanin,
a Lanterna contro o çê e o mâ,
a desteiza grixa d' abbæn di teiti,
i incroxi di caroggi streiti streiti,
o porto davanti a Caricamento
e ti te sentiê ûn zeneize contento
de sentî o tò parlâ strannio
lontan da casa semenôu in gïo.

Sergio Marini